لمَّا تَغَمَّدَنِى الأَمَلْ ( 1)



كم مِنْ مساءٍ فى المَلَلْ
من غيرِ طَيْفِكَ يا أَمَلْ
كم من مساءٍ مَرَّ بِى
وبِعَتْمَةِ السُّهْدِ اكْتَحَلْ
أحيا بليلٍ حالِكِ
الآفاقِ يَقْتُلُنِى المَلَلْ
أَجْتَرُّ آلامَ الطِّعَانِ
بما يَجِىءُ وما رَحَلْ
صُوَرٌ تَمُرُّ بِلَفْحَةِ
الوَجَعِ الرَّهِيْبِ على مَهَلْ
تكوى هُنَا ، تَشْوِى هُنَا
بَدْءَاً مِنَ الحِمَمِ الأُوَلْ
فى سِجْنِ ليلٍ أسْتَعِيْدُ
رُؤَى العذابِ ولا أَمَلْ
ويُغِيْثُنِى دمْعِى فَيُطْفِؤُنِى
ووجْهِى يَغْتَسِلْ
حتى أرانِى كالْمَهِيضِ
وكُلُّ ما فيهِ ذَبُلْ
فَأَغُطُّ فى نومٍ تُنَاوِبُهُ
الهُمُومُ بِلا كَلَلْ
**
كم من مساءٍ بالعِلَلْ
هذا صَحَا ، هذا جَفَلْ
هذا أضاءَ لِتَوِّهِ
يَكْوِى الضُّلُوعَ ،وذا أَفَلْ
والبائِسُ المَحْرُومُ يسألُ
فى سُكُوت ٍ أَلْفَ هَلْ؟
هل ما يزالُ له الكثيرُ
أم القليل ، أم الأقَلْ؟
فالنُّوُر قَل َّ ،الفَرْحُ قَلَّ
الجُهْدُ قَلَّ ،الوُدُّ قَلْ
فَلِمَ الوَفَاءُ يكونُ أَوْفَى
فى وُجُودٍ يَضْمَحِلْ؟!
وَسِعَ الجَفَا حتى اخْتَفَى
قَلْبٌ على قَلْبٍ يُطِلْ
كمْ مِنْ ليالٍ لا تَرَى
بَدْرَاً بِظُلْمَتِهَا يَهِلْ
والنَّارُ تَلْتَهِمُ القُلُوبَ
ولا سِوَى الدَّمْعِ بَلَلْ
عمَّ الجُحُودُ على الوُجُودِ
أصابَ جَوْهَرَهُ الخَلَلْ
جَمُدَتْ مَشَاعِرُهُ وغَطَّ
العَقْلُ فى بَحْرِ الخَبَلْ
ما هكذا شَهِدَ الوُجُودُ
ولا حَيَا مُنْذُ الأَزَلْ
حَلَّ الجَفَا بَدَلَ الوَفَا
فَظَّاً فَيَا بِئْسَ البَدَلْ
والطُّهْرُ أصْبَحَ فى رُؤَى
النَّاسِ عَقِيمَاً مُبْتَذَلْ
نَهْرُ الحنانِ عَفَا الحَنِينَ
كأنَّهُ بِهِمَا بَخَلْ
والكونُ يَتْرَعُ مِنْ جَفَا
بَغْضَائهِ حتى ثَمِلْ
فعلامَ يا مَنْ قَلْبُهُ
فى حُرْقَةِ الغَدْرِ تَسَلْ؟
قُلْ يا حَنَانُ ولا تَقُلْ
يا غَيْرَهُ هاتِ الأَمَلْ
قُلْ يا حَنَانُ ولا تَقُلْ
مُلْكَاً ولا رَغَدَاً ،أَجَلْ
قُلْ يا حَنَانُ ولا تَقُلْ
أعْلَى المَرَاكِزِ والْحُلَلْ
قُلْ يا حَنَانُ ولا تَقُلْ
مالاً يَطُولُ شَفَا زُحَلْ
قُلْ يا حَنَانُ ولا تَقُلْ
شَقْرَاءَ حَوْرَاءَ المُقََلْ
قُلْ يا حَنَانُ ولا تَقُلْ
هَيْفَاءَ مَبْسِمُهَا عَسَلْ
قُلْ يا حَنَانُ ولا تَقُلْ
جِسْمَاً يُزِينُ بما حَفَلْ
قُلْ يا حنَانُ ولا تَقُلْ
بَدَنَاً يُثِيرُ فَتَشْتََعِلْ
يا أَغْفَلَ المُسْتَضْعَفِينَ
شَغُفْتَ بالعَرَضِ الأَذَلْ
وتَرَكْتَ سِرَّ اللهِ فى
دُنْيَا البقاءِ إلى الأَزَلْ
كيفَ اصْطَفَيتَ تَقَرُّبَ
الأدْنَى وغَادَرْتَ الأَجَلْ؟!
أرأيتَ كيفَ الكونُ يَبْقَى
بِالحَنانِ وفِيْهِ حَلْ
لَوْلاهُ ما أيْنَعَ طِفْلٌ
أو عَلَا فِيْهِ جَبَل
لَوْلاهُ ما كانَ لأُمٍّ
فى البَرِيَّةِ أَىُّ فَضْلْ
لَوْلاهُ ما رَقَّتْ رِيَاحٌ
فَوْقَ خَلْقٍ تَرْتَحِلْ
لَوْلاهُ ما الأرضُ سَخَتْ
لَوْلاهُ ما الغَيْثُ هَطَلْ
وانْظُرْ إلى سِرِّ الحَيَاةِ
وغَذِّ رُوحَكَ واسْتَدِلْ
وانْقُلْ بَصِيرَتََكَ انْتَبِهْ
خُذْ مِنْ دَلِيلٍ للأَدَلْ
يا ويلَ مَنْ عَشِقَ الفَنَاءَ
وقَلْبُهُ فِيْهِ اشْتَغَلْ
سَبَّحْتُ باسْمِكَ خَالِقِى
لَمَّا تّغَمَّدَنِى الأَمَلْ
**
كيفَ اهتدى أَنِّى على
البُعْدِ أعِيشُ بلا أَمَلْ
مَنْ نَبَّهَ القَلْبَ الحَنُونَ
بَأنْ يَهُمَّ فَيَتَّصِل
مَنْ ذا الذى أوْحَى لَهُ
زُرْ عَلَّ جُرْحَاً يَنْدَمِل
فإذا بهِ فورا يُوَافِينِى
يَجِيْىءُ على عَجَلْ
وكأنَّ رَبِّى حَثَّهُ
فأجَابَ وحْيَاً قَدْ نَزَلْ
أملٌ أمَلْ ، أمَلٌ أمَلْ
أحْيَيْتَ رُوحِى يا أَمَلْ
ما شاءَ رَبِّى جَاءَنِى
ما قَدَّرَ اللهُ فَعَلْ
أوحَى إلى الأرواحِ أنْ
تَطْوِى الفَضَاءَ وتَتَّصِلْ
ها نِصْفُ رُوحٍ فارْتَحِلْ
يا نِصْفَهَا كى تَكْتَمِلْ
يا رحمةَ الرَّبِّ الجَلِيلِ
هُنَا شَكُورٌ يَبْتَهِلْ
طَافَتْ على رُوحى بِوَحْىِ
اللهِ بالغَوْثِ الجَلَلْ
يا حَظَّ قَلْبٍ يَسْتَجِيبُ
له الرَّحِيمُ إذا سَأَلْ
أبْقَى أُسَبِّحُ يا أَمَلْ
إنْ عِشْتُ فى فَجْرٍ يَهِلْ
باسم الذى يَهْدِى القُلُوبَ
فَتَسْتَجِيبُ وتَمْتَثِلْ
**
وإلى غَدٍ بَوْحٌ جَدِيدٌ
فى شُرُوحٍ تَتَّصِلْ
تَحْكِى الذى أدْرَكْتُهُ
( لمَّا تَغَمَّدَنِى الأَمَلْ )
**
د. محمد عبد المطلب جاد
أستاذ سيكولوجيا الإبداع – جامعة طنطا

صباح الأمل ( 1)

زارنى الأمل من غير معاد
وأنا من زمان عامل حِدَادْ
والدنيا فى عْنَيَّهْ سَوَادْ
يومى نكد ليلِى سُهَادْ
باشْكِى الضَّنَا لرَبِّ العِبَادْ
**
خَبَّطْ على بَابى انْفَتَحْ
دخَلْ البريد عامل فَرَحْ
مَعْرَفْشْ ليه قلبى انْشَرَحْ
ولقيتنى حاسس بالوِدَادْ
**
قال لى أنا هُوَّه الأمل
وسَّعْ عشان اثْبِتْ عَمَلْ
قُلْتْ الأمل كان من زمان
هُوَّه الزمن عُمْرُه اتْوَصَل ؟
الحظ مال من مِيْتْ سنه
إزاى هيرجع يِتْعَدَلْ ؟!
قال لى: لو انْتَ تابِعْتِنِى
هتشوف سنين هايلين جُدَادْ
**
إزاى بصل هيكون عسل ؟!
والنار هتبقى ازاى بلل ؟!
وازاى ظلامى هَيِتْبَدَلْ ؟!
واللين هَيِسْرِى فى الجَمَادْ ؟
**
غَمَّضْ عِينيك ، فَتَّحْ عينيك
الوقتى أيه باين عليك ؟
إقفل إيديك ، افتح إديك
صَدَّقْ دا كُلُّهْ الوقتى لِيك
أنا ربنا قال يا أمل
رُوْحْ الجَدَعْ ده بيناديك
جيت لك عشان قلبك نَدَهْ
جيت لك بأمر اللى مراعيك
موش كنت سايب ربنا
هوه اللى يتولى اللى فيك؟
قال لى أجيلك اشيل شَقَاك
وازرع فَرَحْ يِشْفِى اللى بِيك
ياه يا أمل ، ياه يا أمل
دا كلام حقيقى ؟ الله عليك .
**
الورد نَبِّتْ من جِدِيدْ
والدَّمْ زَغْرَدْ فى الوريد
والليل رَقَصْ والدنيا عيد
ومع الدَّفَا وهَمْسِ الوفا
ونُور الصَّفا وأحْلَى نشيد
ومع النَّغَمْ ويَّا النِّعَمْ
والفرح هَالِلْ من بِعِيدْ
قلبى رقص نشوان سعيد
**
بص الأمل قال لى احْتَييتْ ؟
قلت: وبقالى الوقتى بيت
قال لى: سعيد ، قُلْتْ الحقيقه
أنا حاسس انى معاك بَقِيتْ
زى الفراشة فى الجناين
حَبَّهْ حَبَّهْ فوق عِليتْ
طاير على جناح الهوا
سيبنى كده طاير يا ريت
أنا كُنْتْ فين والوقتى فين؟
ولا عارف انتَ أمته جيت
أمتى السعادة دى ابْتَدَتْ ؟
أمتى الهنا خَدْنِى وْبَكِيتْ؟
أنا كُنْتْ عايش من زمان
على إنِّى يا أمل انتهيت
**
خَدْنِى الأمل وسرح بعيد
وسألنى فين أُمَّكْ يا وَادْ ؟
لَمْلِمْت رُوحِى وقُلْتْ: أيه
تِقْدَرْ تِقُولْ يا سندباد:
أُمِّى حَزِينَهْ يا أمل
شايله على اكتافها جَبَلْ
عايشَه الزَّمَنْ كُلُّه مَلَلْ
فى جَرْحْ بالغ فى النَفَادْ

أمى انْدَبح فيها الأمَانْ
أمَّى جمح بيها الحُصَانْ
أمى اتْرَمَتْ فى بِيْر بُكَاهَا
بْتِشتِكِِِى غَدْرِ الزمان

أمى بِعين شايفه اللى فَاتْ
وعين على بكره اللى مَاتْ
ما لهاش غير نار السُّكَاتْ
وشريط طويل م الذكريات
أمى لو انت قابلتها
كُنْتْ بإديك لفلفتها
وبْكِيتْ أسَى على بَخْتَهَا
ولا كُنْتْ جِيتْ ، ولا سِبْتَهَا
وانا يا أمل غَسِّلْتَهَا
بدموع عنيه وفُوتَّهَا
لله يِدِيْرْ المنتهى
**

يِسْعِدْ صَبَاحَكْ يا أمَلْ
**
د. محمد عبد المطلب جاد
أستاذ سيكولوجيا الإبداع – جامعة طنطا

انبشينى

حركى المكبوت فى نفسى
فجرى المخزون فى عينى
انبشينى عشان اصفى
كل أحزانى وأنينى
حركى جدار المآسى
ومن همومى فرغينى
انكشينى بإيد قويه
فَتِّتِى كل اللى فيه
صَفِّى أوجاعى الرضية
وبحنانك إغسلينى
**
انبشينى عشان افجَّر كل حاجه جوه قلبى
مُرَّى زى النسمه ناديه ، وامسحى همى وكربى
افتحى باب النسايم طُلى على قلبى اللى صايم
وافتحى بابه وقولى له : قول لى على كل المخبى
وادخلى قلبى يا نور عينى ،وجواه استخبى
**
انبشينى ، لما قولتى
واحشنى) شوفى ازاى فتحتى
بحر حبى فاض وغرق
نفسى من فوقى لتحتى
انبشينى بكلمة ثانية
انبشينى لو سمحتى
بس نفسى اعرف يانور
عينى: اما فاض حبى فرحتى ؟
نفسى اكون فرحه فى عينك
تبتسم مطرح ما روحتى
**
انبشينى انا قلبى شايل صبر كل المحرومين
افتحى لى باب صغير ، انبشينى بكلمتين
انبشينى وقولى إن الله خلق
فى الدنيا بدر ملوهش قيمه
وانه لما مسنى نوره وخدنى
للسما كان شُغْل سِيْمَا
وانه لما حط جوايا الأمل
وادانى من روحه الرحيمه
وانه لما حطنى فى النور على عين الملأ
ما كانش من نفسه العظيمه
إفرسينى
خلى قلبى يحكى مين عَمَلِتْ له قيمه
**
مين يا نور عينى اللى خللى
روحى ترجع لى وعقلى؟
مين دفعنى للسما وكان عليه زى أهلى؟
كل ده فعــــــلا مهـــــــوش تخطيطك انتى
دى يا نور عينى حكايه سر
وانتى اللى بدأتى

تسمحى لى بالحكايه
وابتدى من شهر رمضان اللى قبل
ما يطلع البدر ف سمايا
اسمعى منى الحكايه :
فوق ما عندى واللى بيه
وفوق أسايا وفوق شقايا
وانتى عارفه حاجات كفايه
ف شهر سبعه اترقى واحد من ولادى
اترسم ولقيته عاوز يبقى سيدى
جهز الكرباج جلدنى
وكل يوم يقعد قصادى
يفترى وانا قلبى يولع
بين ضلوعى وهوه عادى
وابتدا شهر الصيام
كانت السجاده تغرق من دموعى
فى صلاتى للتراويح والقيام
كنت بادعى يفك كربى أو ياخودنى
كنت باطلب حد فى الدنيا يساعدنى
والطريق مقفول فى وشى
لجنتى ظالمه وسيفها ما اترفعشى
حالفه ما ترد اعتبارى مهما جالها
وابنى ظالم عارف القصه بحالها
كل يوم تنبل سجادتى ف صلاتى
شهر ما شوفته ف حياتى

وانفتح باب السما
هيه ليلة القدر، ليه لأ ، ربما
تبتدى قصة قطر والكتاب اللى اتنشر
http://www.teachers.net.qa/*******/c...rds/detail/781

بعد ظلم سبع سنين ع الوجه ده
والوجه ده ،رق القدر
فاز الكتاب ع العالم العربى اللى
كان فى لجنتى موش معتبر
باقى الحكايه تعرفيه لأنه تم ف
إيدك انتى كل تدبير القدر
الوقتى انا عندى يقين
ان الرضا ونصرى المبين
وان اللقا بالطيبين
وان الحنان والعطف كانوا مدبرين
وان الدموع من عين سجين
كانت ف إيد رب البشر
بصى عليه وفكرى:
انا كنت ايه؟ وبقيت ف ايه؟
وكل دا كان يجرى ليه؟
وبردو لازم تسألى:
هوه الجدع ده سره ايه؟
إيه اللى فيه؟
أنا نفسى باغرق فى تأمل رحلتى
وافضل أقول واحكى لنفسى قصتى
من يوم ميلادى وكنت طفل فى لفتى
وصوابعى أكلتها الفيران
وامشى بها من نار لنار
واوصل بها ليوم الجحيم
والقى فى آخرها الطوفان
والقى النفق فى نهايته نور
صحيح انا عايش مريض
بس ف هنا وغاية السرور
عشان بنام واصحى فى نعمة ربنا
وعندى قلب بطوف على حبه وادور
يا لله افرسينى وقولى قلب ملوش حضور
وحياة حبايبك مرة تانيه تنبشينى
انبشينى عشان اوشوش
نن عينى
**
د. محمد عبد المطلب جاد
أستاذ سيكولوجيا الإبداع – جامعة طنطا

أهلى الكرام

أهلى الكرام ، كل احترام
والعذر عن عدم الكلام
بعد التحية والسلام
غطونى بقصايد الغرام
لما دُجَى اولاد الحرام
يدخل ويطلع فجرنا
**
نطلع نزقزق ع الشجر
ونقول حكاوى للقمر
نعزف أَلَمْنَا ع الوَتَر
ولا حد يمنع حُزْنِنَا
**
نحزن على البيتِ اللى كان
نبكى على أيام زمان
نشرح منين جانا الهوان
وأيه اللى فرق شملنا
**
حُطُّوا على الوِيْبِّ الهُيام
خلوه يلعلع بانتظام
يعمل ضباب يعمل غمام
علشان يِعِدُّوا عَمِّنَا
فى المغرمين
ويْدَوَّرُوا ويفتشوا مُغْرَمْ بِمِين ؟
ولا يهتدوا للى صنعها ربنا
من أحلى طين
قِرْفِتها زين ، وترابها زين
وهواها زين ، وتاريخها زين
وأهلها ناس طيبين
دول ناس عجنهم ربنا حُب وحنين
ناس مؤمنين
كانوا على البيت سهرانين
من قبل ما يت***شوا ف شبكة كوهين

خلص الكلام ، بدأ الغرام
والقلب يبدأ دندنه
**
يا أمى طفلك ف العَرَا واقف حزين
يا طيبه يا سُكَّره ف قلبى أنين
يا بنتى هاتى من حنانك لمستين
يا سمرا يا متعذبه م الغدارين
قلبك وقف ، ريقك نشف
والحسن فيكى بينخطف
وعنيكى ع البيت سهرانين
**
عينك على عمر انقضى
كان له ليالى مفضضه
وقمر ماليها فى الفضا
والذكريات فيها الحنين
**
وعين على العمر اللى جَىّ
مفيهشى ضىّ ولا هُوْ حىّ
سواده كحل مالوهش زىّ
ودموع بتجرى ع الجبين
**
يا أمى ليل الغربه طال
عايش فى حيره وحالى مال
والقلب شال فوق اللى شال
وليالى فرقتنا الطوال
غرقنا حزن ودمع عين
**
يا أمى صوتك كان مدد
بيصبر الروح ع الكَبَد
ويْحُطّ رُوحُهْ فى الجسد
و يعدى ليل المحرومين
**
يا أمى نايم فى ألم
صاحى ف ألم
شارب ندم
حالى عدم
لمسة إديكى يا سمرا كانت
نفخ روح ف اللى اتهزم
بسمة أمل تخلق حياه
تصنع وجود، تِبْنِى هرم
نظرة يقين تدى القلوب
الصبر وتقوى الهِمَمْ
وتعدى ليل المحرومين
**
يا أمى دَوَّخْنِى البُكَا
والقّلْبِ صابِرْ ما اشتكى
والشِّعْر خَدْ مِنِّى وحكى
حالى يا سمرا من سنين
**
يا نن عينى ، إنتى فين ؟
يا سُكَّرَه بِتْحَلِّى بُقّ الصّبَّارين
يا سلسبيل يِرْوِى غليل العطشانين
فين ، يا حبيبة روحى فين ؟
يا سَمْرَا يا بحر الحنان ، قلبى سجين
عقلى سجين
معقول يِكُون حتى الغَرَام بيكى حرام
وكمان حرام الدندنه!!
يا مِيْتْ ضَنَا
يا سَوَاد ليالى المكْبُوتِين
فى المطْحَنَه
**
د. محمد عبد المطلب جاد
أستاذ سيكولوجيا الإبداع – جامعة طنطا